Ches Amis ed Tous ches Efants dech Monde

Ch'est conme cho que s'lonme unne tiote corale ed galibiés qui vo canter, à pèrtir d'innui au vèpe justch'à ch'quatore dech moés d'eu, chu ch'Côte d'Opale, din ches églises ed ches villages dò qu'is iront canter.

I o rin à poaiyer, ch'est bin, mais os pouvez leu bailler aprè edl'argint qu'is invoéront à eds associations qui s'otchupe'te d'éfants qu'ont des problinmes. Ch'est bin étou.

Dò-jou qu'os pourrez les acouter canter ? Lò :
- au vèpe, l'chorale cante à Berck-chu-ches mers,
- ech mardi premier, à Tchéyeu,
- merkerdi deus, à Saint-Wary,
- judi troés, à Hornoé,
- verdi quat, à Martchise,
- sinmdi chonc, à Gamache,
- diminche sis, à Freuchéneuville,
- lindi sèt, à Stella-plage,
- mardi uit, à Esnèrpont,
- ech lindman, à Carcy,
- ech judi dis, à Anmyin,
- verdi onze, à Arainne,
- ech sinmdi douse, à Montreuil-chu-ches mers,
- diminche trèse, à Hèrdlot,
- et pour définir, ech lindi quatore, à Ch'Toutchet, ville bin connue pour ches pichons.

Feut qu'os allèche les acouter.

Et leu bailler un molet d'argint.

Chi os voéyez min nveu, foaisez li un bec d'em pèrt.

Boinne canche à ches éfants,
Boin diminche à tertous.

Ech tricot ed pieu

..., étou lonmé maillot ed corps.

I o à écrire chu ches tricots ed pieu, vu eq ch'est bin conmode pour n'mie avoèr froéd.. Mais i feut un boin tricot ed pieu.

J'esplique.

Pour mi, un boin tricot ed pieu deschind din t'maronne. Pour bin protéger tin dos ed ches keups ed froéd, et conme ho, éviter d'i avoèr du mau.

Deus problinmes !

In premier, t'acates un maillot ed corps qui vo bin, et à mzure eq tu el laves et l'mets à sécher avuc des machines d'achteure, i dvient trop court. Et, un jour, tin dos n'est pu couvert. Feut racater !

In deusienme, tin maillot est toudi bin, mais t'os prins un molet, vir un cros molet ed berdale. Ech vint rinte pèr edvan ti. Et foait ch'tour pour arriver à tin dos.

Don, os érez comprins qu'ej mets toudi un tricot ed pieu. A pèrt in étè.

L'tchulotte étou tient keud ; Ches poéysins d'unne bèle région qu'ej pux mie lonmée et qui n'mettoai'te mie ed tchulotte din leu maronne ont ieu du mau à l'comprinde. Mais un jour, un vindeu leu o dit :
- " Ch'est keud, et ch'est prope."

Un ed ches poéysin o essayé, est allé à cans, o ieu invie ed tchier, et o tchié. In rintrant au vèpe, il o confirmé eq ch'étoait keud, et prope...

Comprins qui vut.

Ch'o arrivé chte smangne

Edpi toutes ches innées eq j'écris, os êtes granmint à avir rbéïé min blog.

Et l'eute jour, jé rbée, et j'avoais à alintour ed quater-vint-dis-uit mile et quèks pages de rbéïées.

Et ièr merekerdi, timpe au matin, j'avoais miu ed chint-mile pages rbéïées.

Cho dvoait arriver un jour ; ch'o arrivé chte smangne.

Ej su ureus.

Tiot message ach Zèf : corage à ti, cho viendro un jour étou pour tin boin blog.

Invie ed déloufer

Edpi quèks jours, i s'cause dechl'étchipe ed fotbal ed Pèris qui voudroait acater un jueu pour deus-chint-vint-millon d'euros.

Mie croéyabe !

Djò qu'un millon n'vut mie dire grin cose o sanne impossibe à avir un jour pour quater-vint-dis nu pèr chint ed ches frinchoés, qu'i m'sanne, adon, deus-chint-vint-millons !

In puss, pour butcher din unne balle !

Mi, cho m'baille l'invie ed déloufer.

Pour voéyager fin rade

... feut prinde echl'avion.

Pèr eximpe, tu vos ed Toulouse à Pèris, feut unne eure et vint minutes. Mettons qu'i foaiche étou unne eure avant et unne eure aprè pour ches inregistremints et ches valises, cho foait troés eures vint.

Quanq eq tu sais qu'in train, achteure, i feut miu ed quat eures, chin compter ndan ches dis minutes avant pour n'mie rater ech train, ch'est seur qu'i feut toudi miu prinde echl'avion.

Mais chi etn'avion il o trinte-troés eures de rtèrd, conme ch'est arrivé l'eute jour à des gins qu'alloai'te ed Bordieux à Alger, adon lò, t'éroais miu foait ed prinde un car. Minme chi i met douse à tchinze eures. Pour aller ed Toulouse à Pèris.

Pour aller ed Bordieux à Alger in car, il feudroait alintour ed vint-quat à trinte eures. Qu'i m'sanne. Ho sroait toudi miu eq trinte-troés eures  et ches deus eures avant et aprè.

Boin voéyage à tertous.

Boin étè.

Pèrdonner

I péroait qu'ech Pape Françoés éroait dit :

- "Diu pèrdonne toudi, l'Onme pèrdonne des keups, et la nature, janmoais."

A buser.

Boin diminche à tertous.


Chi t'os ets ages innui, cros bec à ti.

Ches cotchillètes

Os connoaissez ? Ches tiotes nouilles foaites avuc ech blé durt et avuc un tiot treu au mitan.

Os ainmez ?

Mi, ej les minge keudes, mais étou frèches, avuc unne seuce o bin des tiots morcieus ed freumage o ed tomates, per eximpe..

Cho o un advantage : quanq tu mets à tchuire ches cotchillètes, tu pux in mette granmint. Ho sro toudi minger.

Boin accion à vos.

Un méchant picard

Ch'est mie vu qu'ej su picard eq tous ches gins qui vive'te o di'te vive in Picardie sont des boins, régalants.

I n'o un qu'o étè élu i o quèks smangnes conme député del Sonme et qui dit, achteure, qu'i ch'o innuyé achl'assimblé nationale.

Mi, j'o vu quèks images : echt'onme n'acoute rin.

Chi ch'est des gins conme li qui doé'te nos rprésinter, os allons avir ed saprés problinmes.

I fro miu de rtorner écrire din ches gasètes.

Voèyage in train

Ch'est unne première : un film eq j'o foait tout seu.

Chi tout vo bin, i in éro achteure d'eutes.

Lò, ej vos o mis un monmint ed min voéyage in train in Sibérie. Os avez del canche, ch'est quanq ech train avinche. Eroait pu ête quanq il est arté quater-vint-tchinze minutes in station.

Fuchez patieint.

N'obliez mie ed mé dire quoé qu'os in pensez.

Pour ête précis, seuchez qu'ech voéyage in train foait mile-quat-chint-quat-vint-dis-nu kilomètes et dure trinte-chonc eures et chincante-nu minutes.

Et os voéyons granmint eds abes.

Boinne jornée à tertous.

A l'invers

Diminche, j'étoais ureus de rbéïer ech Tour ed Frinche ed ches bicyclètes : ches coureus étoai'te inter Laissac, din chl'Aveyron eq j'ainme, et ech Puy-in-Velay dò eq j'o kminché ches kmins ed St Jacques-ed-Compostèle i o quèks innées, avuc l'famille d'em fanme.

Diminche, ches coureus sont passés à Aubrac, Nasbinals, Malbouzon, Aumont-Aubrac, Saugues qui sont des bèlés villes ed ches kmins ed St Jacques.

Ej sais pu qui qu'o gaingné ech jour-lò , mais j'o ervu ed bieus poaiyisages ed Frinche. Cho suffit à m'rinde un molet ureus.

Cho m'baille invie d'i rtorner.

Et vos ?

Ches vint-quat eures

... et unne minute ed Vimoutiers, tiote ville ed l'Orne, in Neurmindie.

Vint-quat eures et unne minute ed course ed voétures, ch'est unne minute ed miu eq ches Vint-quat eures dech Mans din l'Sarthe, ville qu'est, ale, din ches Poaiyis-ed-Loère.

A Vimoutiers, l'course ed voétures est chin moteur. I o eq des gins, ches mneus ed voétures, qui pédale'te.

Is sont quat pèr étchipe, chatchun chin tour à pédaler, et i o eds étchipes qui font alintour ed sis-chint tours d'un kilomète. Don, alintour ed sis-chint kilomètes !

In vint-quat eures et unne minute.

Mi, qu'ej fuche honnête, ej connoais Vimoutiers ed nom. Mais j'ainme granmint miu l'tiote ville d'à côté qu'ej connoais étou qu'ed nom, minme chi i o eq sis-chint gins qui i rest'te : Caminbert.

Pouvoèr dormir

Ah ! Qu'os sonmes ureus d'avoèr troés jours à joke quanq os sonmes, conme mi, adité à nos déjoutcher timpe au matin ches jours ò os allons ouvrer.

Os sonmes ureus, quanq os pouvons rester din no lit.

Avant ièr, il o fallu qu'ej me déjoutche à chonc eures chincante, et ièr, sis eures tchinze. Pour mner min fiu qui ouvre in juillet amon ches pompiés.

Il est ureus, et corageus, don, j'i pèrdonne ed m'obliger à m'déjoutcher.

Ches ages

Min fiu fète innui ches vint-chonc ins. Il est ureus ed foaire unne grinde fète et d'inviter des gins qu'il ainme.

I foait cho amon unne ed ches taïonnes.

A sèt-chint kilomètes d'em moaison !!!!

J'i su mie. Vu ches kilomètes.

Et ej su granmint malureus ed mie pouvoèr i ête. Ej su mie Crésuche, et j'ouve ech judi et ch'lindi.

Ej su malureus, mais cho cangero rin.

Pourvu eq li fuche ureus.

Becs à vos. Cros becs à min fiu eq j'ainme.

Quoé foaire ed ches éfants

... in vagances ?

Toutes ches innées, in étè, des pèrints s'dminde'te quoé qu'is vont foaire ed leus galibiés quanq is sront in vagances.

Et toutes ches innées, i o des galibiés qui pèrt'te in colonie.

- "O-jou eq tu pèrs, ti ?"

- "A Merlimont, din ch'Pas-ed-Calais, douse jours pour vir ches mers. Et ti ?

- "Mi, ej vo aller unne smangne in étè pi unne smangne in octobe."

- "Qué canche ! Mais dò-jou eq tu vos ?"

- "A Scieinche-Po, pour ouvrer ches lçons."

- "Euh !"

Boinnés vagances à tous ches jonnes qui i sont.

Pour gaingner ech Tour ed Frinche

... ed ches bicyclètes, mie dzoin ed gaingner granmint d'étapes.

Edpi douse jours, chti qu'in o gaingné l'puss étoait ièr au vèpe chint-quarante-sisienme.

I m'sanne qu'i o un problinme. Coèr quèks innées conme cho et ches gins n'voudront pu rbéïer.

Echl'hernu o vnu

... avuc granmint ed vint, et avant qu'ech train arrive.

Ch'étoait judi au vèpe. Des gins et mi attindoème ech train qui dvoait arriver din deus minutes.

Avant qu'ech train arrive, il o kminché à pluvoèr un tiot molet, pi d'un keup, des grelons et granmint ed vint.

Vu qu'ech train n'étoait mie lò, os sonmes rintrés din l'station. Mais in deus sgondes, os étoème trimpés conmme unne wassingue qui vient d'ête mise din un sieu d'ieu pour néttier unne moaison.

Ech train est arrivé, quarante minutes aprè.

I péroait qu'i o des gins qu'ont adon étè acater des vêtements pour s'canger ! Echl'hernu o foait du bin à ches vindeus.

Ches Monts d'Arté

In ch'monmint, i o, conme tous ches ins in juillet, ech Tour-ed-Frinche ed ches bicyclètes.

Et quanq ch'est ho, i o chti qu'est premier un jour, chti qu'est premier edpi ech premier jour, chti qu'est l'miu ed ches jonnes, et étou, chti qui grimpe ech miu ches montaingnes.

Eh bin cht'innée, chti qui grimpe ech miu ches montaingnes, achteure ò j'écris echl'article, est breton.

Ch'est bin connu qu'in Bretanne, i o ches puss fameuses montaingnes ed Frinche, ches Monts d'Arté, din ch'Beu-dech-tère.

Etpi, quanq eq t'os unne bicyclète conme chu l'photo et eq tu vux mie mouiller tin tchu, t'es dbeut chu ches pédales et tu vos fin rade.

Ech premier dech Tour est, toudi achteure ò j'écris, un inglés. Un inglés qui boét que del ieu.

Coèr un keup, ch'est connu, in Inglétère, is met'te quèk cose din l'ieu qu'is boé'te. Pour i bailler du goût. O pour eute cose.

Boin étè,
Boinnés vagances chi os êtes in vagances. O quanq os i srez.

Ches berbis din ch'train

Vlò miu ed sis ins qu'ej prinds ech train casi chake jour pour aller ouvrer.

Et din ch'train, i o d'eutes gins qui, conme mi, prinde'te ech train casi chake jour edpi sis ins et puss.

Et l'eute jour, ej mé su aperchu qu'i in o qu'ej connoais mie.

Pourquoé ?

Ej vos esplique.

Ech train, il o sèt o uit wagons. Et ches gins, conme mi, mont'te toudi din ches minmes wagons. O casi. Ches gins qui mont'te edvant mont'te toudi edvant, et ches gins qui mont'te din ches darains wagons mont'te toudi din ches darains wagons.

Conme un ho ed berbis.

Vlò kmint eq des keups ches gins n'rincont'te janmoais.

Ed l'umilité

Chi echl'ordjueil avoait un prix,
Un crapieu sroait ech premier prix.

Ch'est coèr un adage afritchin. P't'ête ech darain qu'ej vos mets.

Boin diminche.

Ches boins ouvreus

... frinchoés.

Judi au vèpe, j'étoais din un train qui roule fin rade, et conme cho arrive ed tans in tans, i avoait un onme qui causoait à un eute per téléphone conme chi il étaoit tout seu din ch'train.

- "T'os vu pourquoé qu'os avons mie étè prins per echl'interprinze Binvlotoute* ? Ch'est pour des raisons sociales. I éroait mie fallu qu'os foaisonche ouvrer eds ouvreus ed Frinche, mais per eximpe, d'Inde.
..."

Aprè, unne gin i o dmindé ed causer moinss fort.

Mais cho m'foait buser qu'ed savoèr ho..

Et vos ?

Jé rmerchie Krazutchi, Filipe et ches tiotés guernons, ches deus Nanard et tous ches eutes qui m'ont permis d'écrire echl'article lò.

* Ch'est mie ech vrai nom dechl'interprinze

Interdit ed blog

Din emn interprinze, j'ouve du matin au vèpe. Mais à nonne, ej m'arte alintour d'unne eure pour minger, et pour souffler un molet.

J'in profite pour écrire eds articles chu min blog o bin rbéïer d'eutes blogs, conme per eximpe, chti dech Zèf, chti jornal in picard.

J'in profite, achteure, est edvenu j'in profitoais. Edpi tchinze jours, ch'est pu possibe. Ch'est mie eq cho fuche in rade, mais ch'est interdit.

Qué brin !

Ej su ureus achteure conme un pichon chu ches tères.

Chi t'es unne nièce et eq t'os ets ages innui, cros à ti, tin onme et tin papar.

Hin

Hin est unne ville avuc alintour ed chonc-mile gins qui i rest'te, à l'est del Sonme.

Permi eux, min frère, min nveu, et un fin boin boucher.

Mais cho foait deus keups in quèks moés eq j'intinds causer del ville d'Hin din ches gasètes, et à chake keup, ch'est qu'i o ed cros problinmes.

In vrai, p't'ête qu'i o mie granmint d'ouvrage à Hin, mais quanq eq j'i vo, cho sanne ête unne tiote ville bin régalante.

Chi t'es min frère et eq t'os ets ages innui, fin cros bec à ti.

Sapré Simone

Simone Veil nos o tchités verdi ; Ale est morte. Ej doés rconnoaite eq ch'étoait unne sapré fanme, conme i in o mie tous ches jours qui nai'te, et conme os in rincontrons mie dis unne vie..

Des fanmes qui s'lonmoai'te Simone, j'in o connu deus : Nina Simone, fin boinne canteuse, et unne eute qu'étoait unne taïonne à m'fanme

L'taïonne à 'fanme, un jour os étoème à troés, o dmindé à m'fanme chi ch'étoait mie unne berlure qu'ale alloait foaire in s'merriant avuc mi.

Cho foait buser.

Jou qu'ale avoait p't'ête raison ?

Rinde ches gins ureus

Os avons invie ed rinde ches gins ureus pour ête ureus.

Mais quanq os i arrivons mie, ch'est conme os sonmes des nikdouilles.

Et des keups, des cros nikdouilles.

Adon, pourquoé vive ?

Diu l'o voulu

Diu o inmné, i o deus o troés-mile ins, chin peupe in Israël. Ch'est bin o mau, os pensons quoé qu'os voulons, mais ch'est conme cho. Diu l'o voulu.

Qu'ale nos dit unne fanme rincontrée à Baïkalskoyé, in Républike Bouriate.

A méditer.

Mi, ej dis eq ch'est conme pour unne gin qui meurt. Ch'est bin, chi ch'étoait unne mawaise gin, o mau, chi ch'étoait unne régalante gin, mais Diu l'o voulu. Ch'est conme cho.

Ureus de s'vir

Ièr au vèpe, j'avoais quat d'ems éfants qu'étaoi'te insanne.

Et chu ches quat, i avoait em fille qu'est rintrée ed Russie pour quèks moés.

I manquoait em daraine fille qu'est achteure in Irlinde.

Mes quat éfants étoai'te ureus de s'vir.

Et mi, ureus ed les vir ureus.

Merchi à eux.